Pogača

Učila me baba.

Triba ti kil i po muke, potić teple vode, pola šake soli, koska bire otopjena u mliku joli vodi pa umisi tisto.

Vajaj ga, vajaj ga. Metni ga kisnit na teplo. Odvoji fregulu tista za principale. Stavi tisto zatim u lug na tepli komin. Dobro je ispod njega stavit list kupusa. Razmakni žeravu pa šnjon pokrij čripnju. Ma prin tega tisto prikriži. Za uru i po do dvi, ovisi ti o žeravi, moš pogaču vadit.

Nikad nisan ovo provala, niman komin, a ni zlatne babine ruke. Moja pogača ne bi jemala onu koluru i nebeski mirlis, ča bi i mrce oživija. Kad kupujen kruv, sitin se babine pogače, ćutin babin kuntenat pogled ča mi je blagoslov da svaki novin zalogajen.

Poslušajte zvučni zapis:

Kazivala: Vanja Škrobica

Zapisala: Nika Ruščić