Gulaš od liganj s boben i rižot o' šparog

A ko će znat zašto pusti stranjski svit voli povirit u našu školu?

A e, kad nan reču da bi rado došli, nije to za odbit — triba ih lipo dočekat i još lipše ugostit. Jerbo, kad gosti dođu, a došlo nan troje Španjolaca, red je da ne idu doma gladni.

Stara izreka je da jubav gre kroz želudac pa su nam uskočila dvojica od Sedmorice maćanih: barba Zlatko Škrobica, poznatiji ka Borac i barba Roko Nakir. E, o njima i Sedmorici maćanih, o njihovom velikom srcu i kulinarskim sposobnostima je pisala i Slobodna Dalmacija. Pa smo i mi poželili malo s njima proćakulat, štogod naučit a i lipo obidvat – nešto ukusno, a opet pravo dalmatinsko.

Španjolci, normalan svit s Mediterana, vole pojist i popit istu spizu ka i mi, pa smo se brzo dogovorili da će in naši meštri o` kužine skuvat gluaš (a neki bi rekli brujet) o`liganj s boben i za ove ča ne jidu meso ni ribu (a ima i takvih, Bože prosti), spremali su rižot o` šparog. Barba Borac i Roko su sve donili sa sobon (jer u nas nema ni kužine), odma se vidilo se da znaju svoj posal i da guštaju kuvat. Još su nan donili i bokun lada da se u miru kuva i da nan se Španjolci da skuvaju umisto gulaša (iliti brujeta).

Prvo smo Španolcima, Borcu i Roku dali traverše ča smo činili prije koju godinu za neki projekt. Činimo pusto toga, ko će ga više pamtit za ča je to bilo, glavno da imamo traverši za kužinavanje.

Kad je zavonjala spiza, e, onda nan nije bilo ni do učenja ni do odlaska doma. Kurijožasti smo svi, ča ćemo? Ćirili smo iz učionica, a dok se kuvalo zapiva je i naš Coce, poznatiji učiteljima ka Nikola Pavičin. Bome su ga Španjolci sve razumili jer je muzika svitski jezik ča ne triba prevodit.

Nego, da van rečemo i ricetu:

Gulaš o` liganj s boben

• prvo triba šufigat kapulu, more i poriluk, šta više stavite bit će boji šug

• dok se šufigaje kapula, tribate uposlit nekog da van guli patadu, nariže bokun biloga luka i očisti i nariže lignje i očisti bob

• onda dodate lignje u šufiganu kapulu, dobro pomišajte da se sjube okusi

• tribat će dodat i bokun vode, ono odaktivno

• pustit da kuva pa dodat biloga luka

• dok sve to kuva, triba sitno isickat petrusimula

• a kad već imate nož u ruci, onu oguljenu patadu triba isto isickat na komadiće

• u ključnon trenutku dodate očišćeni domaći bob

• sve dobro promišat

• onda triba dodat temeljac o` kozica i škampi, pire od poma i crnilo

• dodate patadu, soli i papra po žeji

• ne bi bilo lipo bez bokun bilega vina

• sve triba još pustit da se skuva

• a onda tribaju meštri o` kužine provat spizu

• kuvat još koji minut i to van je, svitu moj, to!

 Rižot o' šparog

•  za rižot vaja očistit šparoge

• opet šufigat kapulu i poriluk dok ne zažuti

• dodat rižu i malo izdinstat dok ne zacakli

• sve dobro zalit vodon, a pod obavezno i malo bilog vina

• triba stalno mišat jerbo rižot more zagorit

• posolit dobro

• popaprit

• dodat šparoge

• zalit s još bokun vode i pustit da se kuva

• kad je skoro gotov rižot, kad riža upije vodu, dodat bokun masla i bokun parmezana

• sve dobro izmišat da se maslac rastopi

Eto, mi se topili od gušta, a i nismo ni tribali doma ručat! Još su na kraju Borac i Roko malo pričali sa Španjolcima, lipo su in detaljno objasnili kako se kod nas kužinaje i kako je obid svetinja! Razminili su koju ricetu i svi smo ih pofalili ča dobro kuvaju!

Fala o` srca Borcu i Roku za kužinavanje i ča su ka iskusni gurmani i svitski judi približili našin gostima pinkicu dalmatinskog folklora.

Glavni kuvari: barba Zlatko Škrobica – Borac i barba Roko Nakir

Pomoćni kuvari i kušači: učitelji iz Španjolske Nacho, Jorge i Leticia, učenici i djelatnici OŠ Slatine