Bob na lešo i najboje fritule u našen malon mistu

Opet se kuva u našoj školici 🍽️❗

Kad bi dilili nagrade za škole koje najviše guštaju u spremanju i kušanju jela, mi bi bez konkurencije bili prvaci! A triba neko i guštat!

A evo kako nan je bilo. Došli su nan barba Ivan Dorić i barba Vlado Andrijolić. Barba Vlado je kuva bob na lešo, a barba Ivan svoje poznate fritule – najboje u mistu.

Pa prvo slano.

Najprvo smo išli u nabavu namirnica. A šta mislite di? U vrtal od barba Vlade! Iskopali smo malo patade, ubrali malo boba i mlade kapulice. Lipi niki dućan! Sve zeleno i mirisno. Patadu smo očistili i stavili kuvat u vodu. Očistili smo i zrna boba i malo kasnije i njih ubacili kuvat. I nakon 10-tak minuti smo sve lipo procidili, malo zgnječili patadu da da gušt i dodali nasickanu mladu kapulicu, sol, papar i maslinovo uje. Bilo je za prste polizat!🍴🍽️🍲🍛🥘🌽🥔🥑🍅🌶️🍞🥐🥖🍪

A onda je na red došlo i slatko.

Najboje fritule u mistu – svi kažu. Barba Ive je pravija tri doze, jer ima nas puno ča volimo fritule. Tribala su mu 3 jaja, 3 vanilij šećera, 3 žlice šećera, malo soli, 3 žlice ruma, 3 praška za pecivo, 27 žlica brašna, pola kila čvrstog jogurta, nagratana kora od 3 domaća limuna, 30 deka suvica i malo ekstrakta za sirnice. Zamisija je sve i peka ih na vrućen uju. I onda ih je malo još zasladija sa šećeron u prahu. E, svitu moj, kako su vonjale i kako su bile ukusne. Ma, nije lako učit kad ovako vonja. 🧑🍳🍲🥙🍰🍧🍦🍮

Fala barba Vladi i barba Ivanu ča su nan kuvali i ča su nosili naše nove traverše.

Fala in od srca ča su nan pokazali kako guštat u kuvanju.

A svitu moj, boje ćete znat skuvat ako pogledate video ricetu!

Glavni kuvari: barba Vlade Andrijolić i barba Ivan Dorić

Pomoćni kuvari i kušači: učenici OŠ Slatine