Kapula je krajica kužine!

Kapula je ka žena, krajica kužine.

Bilo da je crljena joli bile kolure, kapula je krajica kužine. Tako baren špjega moja teta Anka.

Crljene kapule su lipše, kolura in daje pinkicu na jubičasto, atraktivne su ka crvenokose žene, u justima su slaje, jačega vonja, kraćega gušta, ma nikima znadu naškodit. A kapule bile kolure su stabilne i ne varadu ukusu. Duraju deboto cilu godinu. Kapulu moš obilato dodavat svakoj spizi i brez nje ne moš šufigavat kupus, kuvat šalšu, brujet, joli gulaš. Ma ni običnu juvu ne moš kuvat ako u nju ne mekneš kapulu, ča si je prije tega bokun izgorija na ploči špakera. Nikad nisam razumila zašto. Morete li zamislit litnju salatu od kukumari, paprik i pom, a brez crljene kapule? A tek ljutika u kvasini ča je jiš sa slanim mesom? A moja teta me temu naučila. Virujte mi, kapula je krajica kužine, šćeta je ča svakega ča je takne joli je počne gulit, natira u plač.

Deboto, ka svaka žena.

Poslušajte zvučni zapis:

Kazivala: Vanja Škrobica

Zapisala: Nika Ruščić