Ti danas nemaš pojma šta je bila prija sveta Luce i nemaš pojma da je sveta Luce jučer bila. A tvoj otac kad je bija u tvojin godin, uvik bi mu nešto sveta Luce donila, ispod kušina bi gleda ča mu je donila sveta Luce. I uvik je nešto naša. A danas nemate pojma ni ča je sveta Luce ni sveti Nikola, ni Božić ni ništa.
A za Božić, moja mater i moja baba bi spremale. Baba bi mendule i orije čistila, sitnila ih na male komadiće. Mater bi misila fritule, špaker bi gorija, oganj je bija, bilo bi teplo. A danas ništa.
I kad sam ja bila mlada, nisan niti struju imala. 17 godin san jemala kad je da je struja došla u Slatine. Eto, 17 godin san bila bez struje.
I kad san se udala, 20 godin san jemala. I rodila dvoje dice, a nisam imala vodu u kući, nego ni blizu kuće. Nego san je morala s Porta nosit, na glavu maštil od 40 litra po osan puti na dan. I kuvat i pelene, nisu onda bile Pampers ka danas, da je baciš. To je bila od flanela pelena, teško je bilo oprat, onda se kuvala roba vanka na tri noge.
Ča ću ti poć govorit…
Poslušajte zvučni zapis:
Kazivala: Dobrila Balić
Zapisala: Laura Balić